نقش قدم ملے جو ترے چل کے سر سے ہم

نقش قدم ملے جو ترے چل کے سر سے ہم

اکثر گزر گئے ہیں تری رہ گزر سے ہم

ہیں بے نیاز تندہیٔ چارہ گر سے ہم

بے خود رہے عنایت درد جگر سے ہم

سمجھے جہاں کو اپنا بڑے کر و فر سے ہم

دیکھے گئے ہمیشہ پرائی نظر سے ہم

نقش قدم سے چمٹے تری رہ گزر سے ہم

پر تیری دید کو رہے ترسے کے ترسے ہم

ہم دیکھتے ہیں تم کو ہماری نگاہ سے

غیروں کو دیکھتے ہیں تمہاری نظر سے ہم

محفوظ کر لے اپنے لئے غم گساریاں

صیاد با خبر ہیں ترے خیر و شر سے ہم

تم کو سمجھ کے تم ستم اپنے پہ ڈھا لئے

کس درجے بے خبر ہیں ہماری خبر سے ہم

اللہ شیخ جی کو تو جنت کرے نصیب

وابستہ صبح و شام رہیں ان کے در سے ہم

لاتے نہ تیرے عشق میں شکوے زبان پر

آپ اپنے کو سمجھتے اگر پیشتر سے ہم

ہم تیرے ہو کے بزم میں تیری نہ رہ سکے

محفل تھی تیری آنکھ سی تیری نظر سے ہم

یا پار ہوں گے چیر کے یا ڈوب جائیں گے

ساحل پہ رک نہ جائیں گے طوفاں کے ڈر سے ہم

نکلی ہوئی دعائیں ابھی جستجو میں ہیں

شاید بعید تر ہیں مقام اثر سے ہم

نظروں سے سب کی گر گئے پروا نہ تھی ہمیں

لیکن غضب ہے گرتے ہیں اپنی نظر سے ہم

کیا حشر ہونے والا ہے دیکھیں گے اے ذکیؔ

بیٹھے ہیں دل لگا کے کسی فتنہ گر سے ہم

naqsh-e-qadam mile jo tire chal ke sar se ham

aksar guzar gae hain tiri rah guzar se ham

hain be niyaz tandihi-e-chara gar se ham

be khud rahe inayat dard-e-jigar se ham

samjhe jahan ko apna bare kar-o-far se ham

dekhe gae hamesha parai nazar se ham

naqsh-e-qadam se chimte tiri rah guzar se ham

par teri did ko rahe tarse ke tarse ham

ham dekhte hain tum ko hamari nigah se

ghairon ko dekhte hain tumhari nazar se ham

mahfuz kar le apne liye gham gusariyan

sayyad ba khabar hain tire khair-o-shar se ham

tum ko samajh ke tum sitam apne pe dha liye

kis darje be khabar hain hamari khabar se ham

allah shaikh ji ko to jannat kare nasib

wabasta subh-o-sham rahen un ke dar se ham

late na tere ishq mein shikwe zaban par

ap apne ko samajhte agar peshtar se ham

ham tere ho ke bazm mein teri na rah sake

mahfil thi teri ankh si teri nazar se ham

ya par honge chir ke ya dub jaenge

sahil pe ruk na jaenge tufan ke dar se ham

nikli hui duaen abhi justuju mein hain

shayad baid tar hain maqam-e-asar se ham

nazron se sab ki gir gae parwa na thi hamen

lekin ghazab hai girte hain apni nazar se ham

kya hashr hone wala hai dekhenge ai zaki

baithe hain dil laga ke kisi fitna gar se ham