وہ قریۂ مہتاب رہے صبح و مسا یاد

وہ قریۂ مہتاب رہے صبح و مسا یاد

کچھ بھی نہ رہے شہر تمنا کے سوا یاد

انوار کی بارش تھی سر منزل طیبہ

ہر منزل خوش دیکھ کے آتا تھا خدا یاد

اب تک ہیں نگاہوں میں در و بام حرم کے

اب تک ہے مجھے وادئ‌ رحمت کی فضا یاد

ہے سیرت اطہر مرا سرمایۂ ہستی

محبوب دو عالم کی ہے ایک ایک ادا یاد

ڈوبے نہ کبھی میرے مقدر کا ستارا

اک بار جو کر لیں مجھے محبوب خدا یاد

قربان ہوئی جاتی تھیں رحمت کی گھٹائیں

ان کانپتے ہونٹوں کا ہے انداز دعا یاد

ہر ایک کے دامن میں مرادوں کے گہر تھے

حافظؔ مجھے دربار کی ہے شان سخا یاد

wo qarya-e-mahtab rahe subh-o-masa yad

kuchh bhi na rahe shahr-e-tamanna ke siwa yad

anwar ki barish thi sar-e-manzil tayyiba

har manzil khush dekh ke ata tha khuda yad

ab tak hain nigahon mein dar-o-bam-e-haram ke

ab tak hai mujhe wadi-e-rahmat ki faza yad

hai sirat athar mira sarmaya-e-hasti

mahbub do alam ki hai ek ek ada yad

dube na kabhi mere muqaddar ka sitara

ik bar jo kar len mujhe mahbub-e-khuda yad

qurban hui jati thin rahmat ki ghataen

un kanpte honton ka hai andaz-e-dua yad

har ek ke daman mein muradon ke guhar the

hafiz mujhe darbar ki hai shan-e-sakha yad