بچھڑ کر اب ذرا آزار کھینچو

بچھڑ کر اب ذرا آزار کھینچو

تم اپنے دل میں اک دیوار کھینچو

بھلا لوگوں سے کیسا ڈر چلو بھی

کوئی دامن سر بازار کھینچو

حیات اپنی سفر ہے اک مسلسل

اٹھو پیروں سے اپنے خار کھینچو

محبت جس طرح چاہو جتاؤ

مگر یہ کیا مرے رخسار کھینچو

مرے ہاتھوں میں گل ہیں اور فقط گل

مرے یارو نہ تم تلوار کھینچو

ارے صائنؔ نشے سے فیض پاؤ

چلو واعظ کی اب دستار کھینچو

bichhar kar ab zara azar khincho

tum apne dil mein ik diwar khincho

bhala logon se kaisa dar chalo bhi

koi daman sar-e-bazar khincho

hayat apni safar hai ik musalsal

utho pairon se apne khar khincho

mohabbat jis tarah chaho jatao

magar ye kya mire rukhsar khincho

mire hathon mein gul hain aur faqat gul

mire yaro na tum talwar khincho

are sain nashe se faiz pao

chalo waiz ki ab dastar khincho