خواب کی کوکھ میں پلتے ہوئے رو پڑتے ہیں

خواب کی کوکھ میں پلتے ہوئے رو پڑتے ہیں

نیند میں پہلو بدلتے ہوئے رو پڑتے ہیں

مجھ سے چھپ کر میرے کاندھوں کے فرشتے اکثر

گھر کے آنگن میں ٹہلتے ہوئے رو پڑتے ہیں

اے پری زاد تری یاد میں بیٹھے ہم لوگ

ہاتھ کو ہاتھ سے ملتے ہوئے رو پڑتے ہیں

روز اک یاد ہمیں زخم دیا کرتی ہے

روز اک یاد میں جلتے ہوئے رو پڑتے ہیں

صبح کی گود کے پالے ہوئے منظر اکثر

ہجر کی رات میں ڈھلتے ہوئے رو پڑتے ہیں

دیکھ کر شہر کی گلیوں کے مناظر خونیں

شہر آشوب میں چلتے ہوئے رو پڑتے ہیں

اتنے مانوس ہیں ہم کوچۂ جاناں سے گمانؔ

ہم ترے گھر سے نکلتے ہوئے رو پڑتے ہیں

khwab ki kokh mein palte hue ro parte hain

nind mein pahlu badalte hue ro parte hain

mujh se chhup kar mere kandhon ke farishte aksar

ghar ke angan mein tahalte hue ro parte hain

ai pari zad tiri yad mein baithe ham log

hath ko hath se milte hue ro parte hain

roz ik yad hamen zakhm diya karti hai

roz ik yad mein jalte hue ro parte hain

subh ki god ke pale hue manzar aksar

hijr ki rat mein dhalte hue ro parte hain

dekh kar shahr ki galiyon ke manazir khunin

shahr-e-ashob mein chalte hue ro parte hain

itne manus hain ham kucha-e-janan se guman

ham tire ghar se nikalte hue ro parte hain