Arooz is now on the App Store, for iPhone and iPad. Download →

All poetry

محبت میں بڑا چھوٹا نہیں ہے

Ujjawal Vashishtha (b. 1997)

محبت میں بڑا چھوٹا نہیں ہے

مگر ایسا کبھی ہوتا نہیں ہے

ابھی کیسے کہیں ہم بات دل کی

ابھی تو نام بھی پوچھا نہیں ہے

نہ جانے کب بہا لے جائے آنسو

کسی کے بس میں یہ دریا نہیں ہے

ابھی آسان ہے مجھ کو ڈبونا

یقیں کا پل ابھی ٹوٹا نہیں ہے

شجر سارے برہنہ جسم کیوں ہیں

ابھی موسم تو پت جھڑ کا نہیں ہے

تمہارے ہاتھ بھی ہیں آج خالی

ہمارے پاس بھی کاسہ نہیں ہے

تمہارے شہر میں میں اجنبی ہوں

یہاں مجھ کو کوئی خطرہ نہیں ہے

میں کرتا رہتا ہوں خدمت ادب کی

یہ میرا شوق ہے پیشہ نہیں ہے