Arooz is now on the App Store, for iPhone and iPad. Download →

All poetry

ایک معصوم تمنا کی فضا تھی کل تک

Jafar Sahni (1941–2018)

ایک معصوم تمنا کی فضا تھی کل تک

زندگی ایسی کہاں ہوش ربا تھی کل تک

غیظ آندھی کا بنا اب ہے مقدر میرا

دل کے آنگن میں مہکتی سی صبا تھی کل تک

نغمگی آ گئی کس طور سے اس کے لب پر

جس کی آواز ترنم سے جدا تھی کل تک

آج خاموش بہت بزم بہاراں کیوں ہے

گنگناتے سے لبادے میں ہوا تھی کل تک

حسن کی شوخ نظر مانگے ہے قیمت اپنی

جھکتی آنکھوں کے دریچے میں حیا تھی کل تک

یہ جو ہنگاموں سے مربوط ہے محفل میری

کیف زا دل ربا بلبل کی صدا تھی کل تک

سرنگوں وقت کے قدموں میں ہے خواہش اپنی

ورنہ ہر سانس میں اک موج انا تھی کل تک

اب کہاں شوق کو ملتا ہے بڑھاوا جعفرؔ

نرم پلکوں میں گھلی ایک ادا تھی کل تک