خاموش نگاہوں سے وہ یلغار کا ہونا

خاموش نگاہوں سے وہ یلغار کا ہونا

ملتا ہے نفی میں کسی اقرار کا ہونا

محفوظ مرے خواب کو بتلاتا نہیں ہے

اک عکس تردد میں نگہ دار کا ہونا

حیرت میں نہیں ڈالتا اب شہر گماں کو

ہر روز لہو رنگ میں اخبار کا ہونا

آثار تعلق کو جلا دیتا ہے اکثر

گمنام کسی درد میں غم خوار کا ہونا

رستے کے تکلف سے چلو بات کریں کچھ

ممکن نہیں ہر موڑ پہ گھر بار کا ہونا

لمحوں کے اشاروں سے عیاں ہونے لگا ہے

گلیوں میں مرے یار کی اغیار کا ہونا

کرتا ہے بہت یاد شب و روز مرا دل

پھولوں کے نگر میں رہ پر خار کا ہونا

اقلیم جفا کیش میں تم دیکھنا جعفرؔ

لازم ہے پس در کسی دیوار کا ہونا

khamosh nigahon se wo yalghar ka hona

milta hai nafi mein kisi iqrar ka hona

mahfuz mire khwab ko batlata nahin hai

ik aks taraddud mein nigah dar ka hona

hairat mein nahin dalta ab shahr guman ko

har roz lahu rang mein akhbar ka hona

asar-e-taalluq ko jala deta hai aksar

gumnam kisi dard mein gham khwar ka hona

raste ke takalluf se chalo bat karen kuchh

mumkin nahin har mor pe ghar bar ka hona

lamhon ke isharon se ayan hone laga hai

galiyon mein mire yar ki aghyar ka hona

karta hai bahut yad shab-o-roz mira dil

phulon ke nagar mein rah pur khar ka hona

iqlim jafa kesh mein tum dekhna jaafar

lazim hai pas dar kisi diwar ka hona