زرد پتا جو ڈال سے نکلا

زرد پتا جو ڈال سے نکلا

حسرتوں کے وبال سے نکلا

اپنا وہم و گماں قوی کر کے

وقت آخر زوال سے نکلا

زندگی کا طویل ہنگامہ

لال سورج کے تھال سے نکلا

لوگ چپ تھے مگر وہ افسانہ

وقت کے قیل و قال سے نکلا

محو حیرت ہے آج تک منزل

راستہ کیسی چال سے نکلا

وہ زماں اور مکاں سے آگے تھا

مطمئن ہر خیال سے نکلا

کیسے طے ہو بچا ہوا رستہ

شیر بیٹھا ہے جال سے نکلا

لو بغل میں سمیٹ کر رکھ لو

ہاتھ ٹھنڈا ہے شال سے نکلا

کیسا مبہم جواب اے جعفرؔ

میرے واضح سوال سے نکلا

zard patta jo dal se nikla

hasraton ke wabal se nikla

apna wahm-o-guman qawi kar ke

waqt akhir zawal se nikla

zindagi ka tawil hangama

lal suraj ke thal se nikla

log chup the magar wo afsana

waqt ke qil-o-qal se nikla

mahw-e-hairat hai aj tak manzil

rasta kaisi chal se nikla

wo zaman aur makan se age tha

mutmain har khayal se nikla

kaise tai ho bacha hua rasta

sher baitha hai jal se nikla

lo baghal mein samet kar rakh lo

hath thanda hai shal se nikla

kaisa mubham jawab ai jaafar

mere wazeh sawal se nikla