جبیں پہ شہر کی لکھ کر فضا اداسی کی

جبیں پہ شہر کی لکھ کر فضا اداسی کی

بہت ہے خوش کوئی دے کر دعا اداسی کی

حیات پا نہ سکے گی حسین سی خواہش

سماعتوں میں ہے جب تک صدا اداسی کی

فلک کے چاند ستاروں میں روشنی کم ہے

مجھے تو لگتی ہے اس میں خطا اداسی کی

چہکتی شام میں معصوم قہقہوں کے بیچ

سجی ہے کیوں ترے سر پر ردا اداسی کی

چراغ شوق سے آخر وہ ہو گیا روشن

لیے تھی قید میں جس کو گھٹا اداسی کی

نہ ہو سکا مجھے معلوم کر گئی کیسے

مرے وجود کو لرزاں ہوا اداسی کی

غموں کی رت سے کبھی دل فگار مت ہونا

خوشی لٹا گئی اکثر ادا اداسی کی

مسرتوں سے کہیں دل ربا ستم نکلا

لپیٹے شال بہت خوش نما اداسی کی

عجیب حال ہے جعفرؔ بدلتے موسم کا

کسی کو کر گئی شاداں سزا اداسی کی

jabin pe shahr ki likh kar faza udasi ki

bahut hai khush koi de kar dua udasi ki

hayat pa na sakegi hasin si khwahish

samaaton mein hai jab tak sada udasi ki

falak ke chand sitaron mein raushni kam hai

mujhe to lagti hai is mein khata udasi ki

chahakti sham mein maasum qahqahon ke bich

saji hai kyun tire sar par rida udasi ki

charagh-e-shauq se akhir wo ho gaya raushan

liye thi qaid mein jis ko ghata udasi ki

na ho saka mujhe maalum kar gai kaise

mire wajud ko larzan hua udasi ki

ghamon ki rut se kabhi dil figar mat hona

khushi luta gai aksar ada udasi ki

masarraton se kahin dil ruba sitam nikla

lapete shal bahut khush numa udasi ki

ajib hal hai jaafar badalte mausam ka

kisi ko kar gai shadan saza udasi ki