گر گئے جب سبز منظر ٹوٹ کر

گر گئے جب سبز منظر ٹوٹ کر

رہ گیا میں اپنے اندر ٹوٹ کر

سو رہے تھے شہر بھی جنگل بھی جب

رو رہا تھا نیلا امبر ٹوٹ کر

میں سمٹ جاؤں گا خود ہی دوستو

میں بکھر جاتا ہوں اکثر ٹوٹ کر

اور بھی گھر آندھیوں کی زد میں تھے

گر گیا اس کا ہی کیوں گھر ٹوٹ کر

رو رہا ہے آج بھی تقدیر پر

سبز گنبد سے وہ پتھر ٹوٹ کر

اب نہیں ہوتا مجھے احساس کچھ

میں ہوں اب پہلے سے بہتر ٹوٹ کر

چند ہی لمحوں میں تابشؔ بہہ گیا

میری آنکھوں سے سمندر ٹوٹ کر

gir gae jab sabz manzar tut kar

rah gaya main apne andar tut kar

so rahe the shahr bhi jangal bhi jab

ro raha tha nila ambar tut kar

main simat jaunga khud hi dosto

main bikhar jata hun aksar tut kar

aur bhi ghar andhiyon ki zad mein the

gir gaya us ka hi kyun ghar tut kar

ro raha hai aj bhi taqdir par

sabz gumbad se wo patthar tut kar

ab nahin hota mujhe ehsas kuchh

main hun ab pahle se behtar tut kar

chand hi lamhon mein tabish bah gaya

meri ankhon se samundar tut kar