ہو گئی ساری پشیمانی عبث

ہو گئی ساری پشیمانی عبث

اپنی ہستی ہم نے پہچانی عبث

اب نکلتا ہی نہیں صورت سے عکس

دل کی یہ آئینہ سامانی عبث

آنکھ پتھر کی طرح ساکت ہو جب

قلزم خوں کی یہ جولانی عبث

زندگی ہے ریگ زار بے کراں

دیدۂ بے تاب طغیانی عبث

ملنے پر حیران ہونا تھا صباؔ

چھوٹ کر ان سے یہ حیرانی عبث

ho gai sari pashemani abas

apni hasti ham ne pahchani abas

ab nikalta hi nahin surat se aks

dil ki ye aina samani abas

ankh patthar ki tarah sakit ho jab

qulzum-e-khun ki ye jaulani abas

zindagi hai reg-e-zar-e-be karan

dida-e-be tab tughyani abas

milne par hairan hona tha saba

chhut kar un se ye hairani abas