کھڑکیاں کھولیں تو مجھ کو آج اندازہ ہوا

کھڑکیاں کھولیں تو مجھ کو آج اندازہ ہوا

میرا ہی سایہ تھا وہ دیوار سے لپٹا ہوا

آج کی شب بھی پلٹ آئے بنا دستک دئے

سو رہا تھا گھر میں کوئی رات کا جاگا ہوا

اس گلی کے موڑ پہ بیٹھا ہوں کتنی دیر سے

جس طرح کوئی مسافر ہوں تھکا ہارا ہوا

جس طرف بھی اب اڑا لے جائیں مجھ کو آندھیاں

ایک پتہ ہوں ہوا کے دوش پہ رکھا ہوا

اور بھی کچھ دور آ پہنچے ہم اپنے شہر سے

لگ رہا تھا راستہ جانا ہوا بوجھا ہوا

سو گیا ہے میرے سینے سے لگا کر اپنا سر

اک کھلونے کے لیے بچہ کوئی روتا ہوا

بے تعلق سا پڑا تھا موسموں کے سامنے

سبز پتہ کوئی اپنی شاخ سے ٹوٹا ہوا

دھند میں لپٹی ہوئی تھیں اپنی تحریریں سبھی

پڑھ نہیں پائے ظفرؔ ہم ہاتھ کا لکھا ہوا

khirkiyan kholen to mujh ko aj andaza hua

mera hi saya tha wo diwar se lipta hua

aj ki shab bhi palat ae bana dastak diye

so raha tha ghar mein koi rat ka jaga hua

us gali ke mor pe baitha hun kitni der se

jis tarah koi musafir hun thaka hara hua

jis taraf bhi ab ura le jaen mujh ko andhiyan

ek pata hun hawa ke dosh pe rakha hua

aur bhi kuchh dur a pahunche ham apne shahr se

lag raha tha rasta jana hua bujha hua

so gaya hai mere sine se laga kar apna sar

ik khilaune ke liye bachcha koi rota hua

be taalluq sa para tha mausamon ke samne

sabz pata koi apni shakh se tuta hua

dhund mein lipti hui thin apni tahriren sabhi

parh nahin pae zafar ham hath ka likha hua