بجا تھا زعم اگر اپنے بال و پر کا تھا

بجا تھا زعم اگر اپنے بال و پر کا تھا

کہ شوق بھی تو اسے چاند کے سفر کا تھا

کہاں سے ٹوٹ پڑی بیچ میں فصیل جہاں

معاملہ تو فقط میرے بام و در کا تھا

میں لوٹ آیا دبے پاؤں گھر کے آنگن سے

مکان غیر کا دروازہ اپنے گھر کا تھا

خود اپنے سائے کو گھیرے میں لے کے بیٹھ گیا

کہ اہتمام مرے آخری سفر کا تھا

چھپائے بیٹھے تھے کچھ ماہ و سال ہم بھی وہیں

جہاں پہ تذکرہ پیار بھر کا تھا

ہم اپنے جذبہ و احساس لے کے پہنچے تھے

تمام کھیل وہاں ہاتھ کے ہنر کا تھا

وہ اب بھی حلقۂ دام نظر میں پھیلا ہے

جو سبز سایہ ترے پیار کے شجر کا تھا

ملے جو اس کی سہیلی سے ہم تو راز کھلا

خطوں میں ذکر کسی اور ہی ظفرؔ کا تھا

baja tha zaam agar apne bal-o-par ka tha

ke shauq bhi to use chand ke safar ka tha

kahan se tut pari bich mein fasil-e-jahan

muamla to faqat mere bam-o-dar ka tha

main laut aya dabe paon ghar ke angan se

makan ghair ka darwaza apne ghar ka tha

khud apne sae ko ghere mein le ke baith gaya

ke ehtimam mire akhiri safar ka tha

chhupae baithe the kuchh mah-o-sal ham bhi wahin

jahan pe tazkira pyar bhar ka tha

ham apne jazba-o-ehsas le ke pahunche the

tamam khel wahan hath ke hunar ka tha

wo ab bhi halqa-e-dam-e-nazar mein phaila hai

jo sabz saya tire pyar ke shajar ka tha

mile jo us ki saheli se ham to raz khula

khaton mein zikr kisi aur hi zafar ka tha