تمہارے شہر میں تھا بھی تو اک مسافر میں

تمہارے شہر میں تھا بھی تو اک مسافر میں

سو تھک کے بیٹھ گیا راستے میں آخر میں

میں ہر لحاظ سے سیراب تھا خدا کی قسم

یہ اور بات کہ پیاسا رہا بظاہر میں

حروف ملتے ہی آواز ڈوب جاتی ہے

جو چپ رہوں نہ بتاؤ تو کیا کروں پھر میں

کسی بھی سمت بھٹکتا پھروں یمین و یسار

تلاش راہ کروں بھی تو کس کی خاطر میں

مری خوشی کو یہی ربط باہمی ہے بہت

مرا مغنی ہے وہ اور اس کا شاعر میں

یہ کھیل ختم بنا ہار جیت کے ہوگا

کہ جس ہنر میں وہ یکتا اسی میں ماہر میں

ہزار باندھا گیا مجھ پہ آئنوں کا حصار

کسی پہ اپنے علاوہ ہوا نہ ظاہر میں

tumhare shahr mein tha bhi to ik musafir mein

so thak ke baith gaya raste mein akhir mein

main har lihaz se sairab tha khuda ki qasam

ye aur bat ke pyasa raha bazahir mein

huruf milte hi awaz dub jati hai

jo chup rahun na batao to kya karun phir main

kisi bhi samt bhatakta phirun yamyun-o-yasar

talash rah karun bhi to kis ki khatir mein

miri khushi ko yahi rabt-e-bahami hai bahut

mira mughanni hai wo aur us ka shayar mein

ye khel khatm bana har jit ke hoga

ke jis hunar mein wo yakta isi mein mahir mein

hazar bandha gaya mujh pe ainon ka hisar

kisi pe apne alawa hua na zahir mein