جو تاب دید ملی بھی تو کیا دکھائی دیا

جو تاب دید ملی بھی تو کیا دکھائی دیا

دلوں کے بیچ عجب فاصلہ دکھائی دیا

سحر کا نکلا ہوا میں جو شام کو لوٹا

تو میرے گھر میں کوئی دوسرا دکھائی دیا

خلا میں بس گئے سب لوگ ایک اک کر کے

زمیں پہ جانے یہ کیا حادثہ دکھائی دیا

اڑاتے جاتے ہو خود کو یہ کس طرف یارو

سفر میں کیا کوئی رستہ نیا دکھائی دیا

نہ راس آیا مجھے میری قربتوں کا سفر

مرا خیال بھی مجھ سے جدا دکھائی دیا

نہ باڑھ آئی نہ طوفان ہی اٹھے امسال

سمندروں کا بھرم ٹوٹتا دکھائی دیا

تری نگاہ کی گہرائیوں میں دیکھا تو

مرا وجود پگھلتا ہوا دکھائی دیا

جہاں پہ سانس بھی لینا تھا ایک جرم ظفرؔ

وہاں بھی میرا لہو بولتا دکھائی دیا

jo tab did mili bhi to kya dikhai diya

dilon ke bich ajab fasla dikhai diya

sahar ka nikla hawa mein jo sham ko lauta

tu mere ghar mein koi dusra dikhai diya

khala mein bas gae sab log ek ik kar ke

zamin pe jane ye kya hadisa dikhai diya

urate jate ho khud ko ye kis taraf yaro

safar mein kya koi rasta naya dikhai diya

na ras aya mujhe meri qurbaton ka safar

mira khayal bhi mujh se juda dikhai diya

na barh ai na tufan hi uthe imsal

samundaron ka bharam tutta dikhai diya

tiri nigah ki gahraiyon mein dekha to

mira wajud pighalta hua dikhai diya

jahan pe sans bhi lena tha ek jurm zafar

wahan bhi mera lahu bolta dikhai diya