ایک پودا جو اگا ہے اسے پانی دینا

ایک پودا جو اگا ہے اسے پانی دینا

اپنے آنگن کو نئی رت کی کہانی دینا

تری آواز سے جب ٹوٹے مرے گھر کا سکوت

در و دیوار کو بھی سحر بیانی دینا

پونچھ لینا مری پلکوں سے لہو کی بوندیں

مری آنکھوں کو اگر منظر ثانی دینا

کشتیاں دینا مگر اذن سفر سے پہلے

ٹھہرے پانی کو بھی دریا کی روانی دینا

یوں جلوں میں کہ نہ شرمندہ رہوں سورج سے

اور کچھ اور مجھے سوختہ جانی دینا

ریت پر نقش کف پا نہیں رہنے پاتے

اہل صحرا کو کوئی اور نشانی دینا

ek pauda jo uga hai use pani dena

apne angan ko nai rut ki kahani dena

tiri awaz se jab tute mire ghar ka sukut

dar-o-diwar ko bhi sehr bayani dena

ponchh lena miri palkon se lahu ki bunden

miri ankhon ko agar manzar-e-sani dena

kashtiyan dena magar izn-e-safar se pahle

thahre pani ko bhi dariya ki rawani dena

yun jalon mein ke na sharminda rahun suraj se

aur kuchh aur mujhe sokhta jani dena

ret par naqsh-e-kaf-e-pa nahin rahne pate

ahl-e-sahra ko koi aur nishani dena