چند فقرے زیر لب تڑپا کیے

چند فقرے زیر لب تڑپا کیے

وہ ہمیں اور ہم انہیں دیکھا کیے

غم تھا اپنی بد نصیبی کا انہیں

دیر تک کچھ لفظ کل رویا کیے

میرے قدموں میں رہی منزل مری

راستے صورت مری دیکھا کیے

غم بھی اک نعمت ہے لیکن دوستو

ہم اسے پایا کیے کھویا کیے

مجھ سے مل کر کل مرے احباب بھی

دیر تک کیا جانے کیا سوچا کیے

جس سے رہتی تھی منور یہ زمیں

آسماں وہ چاند تارے کیا کیے

آسمانوں کی طرف چل دی زمیں

ہم اندھیرے غار میں سویا کیے

مل نہ پایا زندگی کا کچھ سراغ

مدتیں گزریں ہمیں پیچھا کیے

چل دیا اک اور پتہ ٹوٹ کر

آندھیوں کے دوش پر تکیہ کیے

کوئی بھی دھرتی نہ راس آئی ہمیں

ہم خلاؤں میں ظفرؔ دیکھا کیے

chand fiqre zer-e-lab tarpa kiye

wo hamen aur ham unhen dekha kiye

gham tha apni bad nasibi ka unhen

der tak kuchh lafz kal roya kiye

mere qadmon mein rahi manzil miri

raste surat miri dekha kiye

gham bhi ik nemat hai lekin dosto

ham use paya kiye khoya kiye

mujh se mil kar kal mire ahbab bhi

der tak kya jane kya socha kiye

jis se rahti thi munawwar ye zamin

asman wo chand tare kya kiye

asmanon ki taraf chal di zamin

ham andhere ghar mein soya kiye

mil na paya zindagi ka kuchh suragh

muddaten guzren hamen pichha kiye

chal diya ik aur pata tut kar

andhiyon ke dosh par takiya kiye

koi bhi dharti na ras ai hamen

ham khalaon mein zafar dekha kiye