خضر جس سے بنے اس آب بقا سے ڈریے

خضر جس سے بنے اس آب بقا سے ڈریے

لمبی عمروں سے بزرگوں کی دعا سے ڈریے

ہم قدم بن گئے اس کے تو ٹھکانہ ہی نہیں

آتی جاتی ہوئی بے سمت ہوا سے ڈریے

نیت جرم ہی ہے جرم کا آغاز یہاں

جو نہ کی ہو اسی ناکردہ خطا سے ڈریے

سانحہ رونما ہو جائے گا شق ہونے پر

تیشہ کو روکئے پتھر کی انا سے ڈریے

پتا پتا یہاں بیٹھا ہے سمیٹے خود کو

گنگناتی ہوئی اس باد صبا سے ڈریے

اور شے ہیں تو کوئی ڈرنے کی حاجت ہی نہیں

آپ بندے ہیں خدا کے تو خدا سے ڈریے

رحمتیں زحمتیں بن جاتی ہیں اکثر اے آہؔ

ہو نہ یہ سیل بلا کالی گھٹا سے ڈریے

khizr jis se bane is ab-e-baqa se dariye

lambi umron se buzurgon ki dua se dariye

ham qadam ban gae us ke to thikana hi nahin

ati jati hui be samt hawa se dariye

niyyat-e-jurm hi hai jurm ka aghaz yahan

jo na ki ho isi nakarda khata se dariye

saneha runuma ho jaega shaqq hone par

tesha ko rokiye patthar ki ana se dariye

patta patta yahan baitha hai samete khud ko

gungunati hui is bad-e-saba se dariye

aur shai hain to koi darne ki hajat hi nahin

ap bande hain khuda ke to khuda se dariye

rahmaten zahmaten ban jati hain aksar ai ah

ho na ye sail-e-bala kali ghata se dariye