سدا بہار جو تھے درد وہ پرانے گئے

سدا بہار جو تھے درد وہ پرانے گئے

ہمارے ساتھ میں موسم بھی سب سہانے گئے

تجھے خبر نہیں تعمیر نو کے پاگل پن

چھتیں گریں تو پرندوں کے آشیانے گئے

جہاں سرابوں کا اک موج موج سورج تھا

وہیں بھڑکتی ہوئی پیاس سب بجھانے گئے

بکھرنے دو کسی آوارہ یاد کی خوشبو

کہ بھول جانے کے بھی اب اسے زمانے گئے

اس ایک نقش گریزاں پہ دسترس کیسی

ہوا جو روٹھی تو رستوں میں ہم منانے گئے

وہ خود بھی ٹوٹ گیا لمس دیدہ ور سے آہؔ

مزاج پھول کا پتھر سے آزمانے گئے

sada bahar jo the dard wo purane gae

hamare sath mein mausam bhi sab suhane gae

tujhe khabar nahin taamir-e-nau ke pagal pan

chhaten giren to parindon ke ashiyane gae

jahan sarabon ka ik mauj mauj suraj tha

wahin bharakti hui pyas sab bujhane gae

bikharne do kisi awara yad ki khushbu

ke bhul jane ke bhi ab use zamane gae

us ek naqsh gurezan pe dastaras kaisi

hawa jo ruthi to raston mein ham manane gae

wo khud bhi tut gaya lams dida war se ah

mizaj phul ka patthar se azmane gae