مت فکر مداوا کر اے دست مسیحائی

مت فکر مداوا کر اے دست مسیحائی

دریاؤں سے گہری ہے اس زخم کی گہرائی

اک منزل ہجرت میں جب یاد تری آئی

رنگوں کو چرا لائی خوشبو کو اڑا لائی

ہر چہرہ پرایا ہے ہر آنکھ میں نفرت ہے

جائے گی کہاں لے کر اے شرم شناسائی

یہ کیسا سویرا تھا کس درد کا سورج تھا

ہر روشنی ظلمت کی دہلیز پہ لے آئی

جب ہجر مقدر ہے ملنے ہی نہیں دے گا

سورج کی تو یکتائی میں چاند کی تنہائی

اب تم کو بھی ہونا ہے اوجھل مری نظروں سے

دیتی ہے صدا مجھ کو وہ منزل رسوائی

mat fikr-e-mudawa kar ai dast-e-masihai

dariyaon se gahri hai is zakhm ki gahrai

ik manzil hijrat mein jab yad tiri ai

rangon ko chura lai khushbu ko ura lai

har chehra paraya hai har ankh mein nafrat hai

jaegi kahan le kar ai sharm shanasai

ye kaisa sawera tha kis dard ka suraj tha

har raushni zulmat ki dahliz pe le ai

jab hijr muqaddar hai milne hi nahin dega

suraj ki to yaktai mein chand ki tanhai

ab tum ko bhi hona hai ojhal miri nazron se

deti hai sada mujh ko wo manzil ruswai