نیاز عشق سے ناز بتاں تک بات جا پہنچی

نیاز عشق سے ناز بتاں تک بات جا پہنچی

زمیں کا تذکرہ تھا آسماں تک بات جا پہنچی

محبت میں کہیں اک رازداں تک بات جا پہنچی

بس اب کیا تھا زمانے کی زباں تک بات جا پہنچی

زمانہ تاڑ لے گا میں نہ کہتا تھا یہ اب سمجھے

مجھے دیوانہ کہنے سے کہاں تک بات جا پہنچی

نظام میکدہ پر تبصرے اور ہوش والوں میں

یہیں سے عظمت پیر مغاں تک بات جا پہنچی

سنا یہ تھا کہ چشمک بجلیوں کو ہے بہاروں سے

ہوا یہ ہے کہ میرے آشیاں تک بات جا پہنچی

رہ منزل میں اے رہ رہ کے ہمت ہارنے والے

خبر بھی ہے کہ میر کارواں تک بات جا پہنچی

niyaz-e-ishq se naz-e-butan tak bat ja pahunchi

zamin ka tazkira tha asman tak bat ja pahunchi

mohabbat mein kahin ik razdan tak bat ja pahunchi

bas ab kya tha zamane ki zaban tak bat ja pahunchi

zamana tar lega mein na kahta tha ye ab samjhe

mujhe diwana kahne se kahan tak bat ja pahunchi

nizam-e-maikada par tabsire aur hosh walon mein

yahin se azmat pir-e-mughan tak bat ja pahunchi

suna ye tha ke chashmak bijliyon ko hai baharon se

hawa ye hai ke mere ashiyan tak bat ja pahunchi

rah-e-manzil mein ai rah rah ke himmat harne wale

khabar bhi hai ke mir-e-karwan tak bat ja pahunchi