کم میسر ہو جو ہوتی ہے اسی کی قیمت

کم میسر ہو جو ہوتی ہے اسی کی قیمت

کثرت غم نے بڑھائی ہے خوشی کی قیمت

پیرویٔ دل ناداں کا سلیقہ ہے جنہیں

ان سے پوچھے کوئی بے راہروی کی قیمت

تم نے ہنستے مجھے دیکھا ہے تمہیں کیا معلوم

کرنی پڑتی ہے ادا کتنی ہنسی کی قیمت

احترام اپنا ہی خود جس کی نگاہوں میں نہ ہو

کیا بھلا اس کی نگاہوں میں کسی کی قیمت

مجھ سے دھوکا تو ہوا دل کو مگر موج سراب

مل گئی مجھ کو مری تشنہ لبی کی قیمت

میرے سینے میں چھپے زخم بتائیں گے رئیسؔ

میں نے جو کی ہے ادا زندہ دلی کی قیمت

kam muyassar ho jo hoti hai usi ki qimat

kasrat-e-gham ne barhai hai khushi ki qimat

pairawi-e-dil-e-nadan ka saliqa hai jinhen

un se puchhe koi be rahrawi ki qimat

tum ne hanste mujhe dekha hai tumhen kya maalum

karni parti hai ada kitni hansi ki qimat

ehtiram apna hi khud jis ki nigahon mein na ho

kya bhala us ki nigahon mein kisi ki qimat

mujh se dhoka to hua dil ko magar mauj-e-sarab

mil gai mujh ko miri tishna labi ki qimat

mere sine mein chhupe zakhm bataenge rais

main ne jo ki hai ada zinda dili ki qimat