تھوڑی سی شہرت بھی ملی ہے تھوڑی سی بدنامی بھی

تھوڑی سی شہرت بھی ملی ہے تھوڑی سی بدنامی بھی

میری سیرت میں اے قیصرؔ خوبی بھی ہے خامی بھی

کتنے عاشق سنبھل گئے ہیں میرا فسانہ سن سن کر

میرے حق میں جیسی بھی ہو کام کی ہے ناکامی بھی

محفل محفل ذکر ہمارا سوچ سمجھ کے کر واعظ

اپنے مخالف بھی ہیں کتنے اور ہیں کتنے حامی بھی

ایسا تو ممکن ہی نہیں ہے چاند میں کوئی داغ نہ ہو

جس میں ہوگی کچھ بھی خوبی اس میں ہوگی خامی بھی

میرا مذہب عشق کا مذہب جس میں کوئی تفریق نہیں

میرے حلقے میں آتے ہیں تلسیؔ بھی اور جامیؔ بھی

یوں تو سکوں کے لمحے قیصرؔ ہوتے ہیں انمول بہت

لیکن اپنے کام آتی ہے دل کی بے آرامی بھی

thori si shohrat bhi mili hai thori si badnami bhi

meri sirat mein ai qaisar khubi bhi hai khami bhi

kitne ashiq sambhal gae hain mera fasana sun sun kar

mere haq mein jaisi bhi ho kam ki hai nakami bhi

mahfil mahfil zikr hamara soch samajh ke kar waiz

apne mukhalif bhi hain kitne aur hain kitne hami bhi

aisa to mumkin hi nahin hai chand mein koi dagh na ho

jis mein hogi kuchh bhi khubi is mein hogi khami bhi

mera mazhab ishq ka mazhab jis mein koi tafriq nahin

mere halqe mein ate hain tulsi bhi aur jami bhi

yun to sukun ke lamhe qaisar hote hain anmol bahut

lekin apne kam ati hai dil ki be arami bhi