افکار کے سانچے میں ڈھلی تازہ غزل ہے

افکار کے سانچے میں ڈھلی تازہ غزل ہے

یا وقت کے پیچیدہ سوالات کا حل ہے

یہ سنگ کی بنیاد پہ تعمیر نہ ہوگا

یہ میرے تخیل کا حسیں شیش محل ہے

میں اپنی محبت کا بدل ڈھونڈ رہا ہوں

وہ کون ہے جو میری محبت کا بدل ہے

اے تار نفس ٹوٹ بھی جا دیر نہ کر اب

احساس کی بالیں پہ کھڑی کب سے اجل ہے

جو عرصۂ ماضی ہے مؤرخ کی نظر میں

شاعر کی نگاہوں میں وہ گزرا ہوا پل ہے

جو ہجر کے موسم میں کھلے داغ کی صورت

وہ پھول بہ الفاظ دگر آگ کا پھل ہے

میں درس تحمل ہوں صباؔ راہ طلب میں

دنیا یہ سمجھتی ہے کہ بازو مرا شل ہے

afkar ke sanche mein dhali taza ghazal hai

ya waqt ke pechida sawalat ka hal hai

ye sang ki buniyad pe taamir na hoga

ye mere takhayyul ka hasin shish mahal hai

main apni mohabbat ka badal dhund raha hun

wo kaun hai jo meri mohabbat ka badal hai

ai tar-e-nafas tut bhi ja der na kar ab

ehsas ki balin pe khari kab se ajal hai

jo arsa-e-mazi hai muarrikh ki nazar mein

shayar ki nigahon mein wo guzra hua pal hai

jo hijr ke mausam mein khule dagh ki surat

wo phul ba alfaz-e-digar ag ka phal hai

main dars-e-tahammul hun saba rah-e-talab mein

duniya ye samajhti hai ke bazu mira shil hai