میں بدلتے موسموں کے رنگ سے بیزار ہوں

میں بدلتے موسموں کے رنگ سے بیزار ہوں

ہر نئی رت سے چمن میں برسر پیکار ہوں

حسن یوسف کے خریدارو بڑھو میری طرف

میں ادب کے دائرے میں مصر کا بازار ہوں

وقت کے ہاتھوں بگڑتا ہوں سنورنے کے لئے

میں سمندر کے کنارے ریت کی دیوار ہوں

کون سا ہے مرحلہ جو مجھ سے طے پاتا نہیں

میں خود اپنے راستے کی منزل دشوار ہوں

جس کو پڑھنا ہے مجھے وہ پہلی فرصت میں پڑھے

صبح کے ہاتھوں میں پچھلی رات کا اخبار ہوں

خواب ہے میرے لئے موج ہوا کی تازگی

میں شجر پر زرد پتے کی طرح بیدار ہوں

میری گردن پر صباؔ ہے اپنی شہرت کا لہو

میں عمل کی روشنی میں جرم کا اقرار ہوں

main badalte mausamon ke rang se bezar hun

har nai rut se chaman mein barsar-e-paikar hun

husn-e-yusuf ke kharidaro barho meri taraf

main adab ke daire mein misr ka bazar hun

waqt ke hathon bigarta hun sanwarne ke liye

main samundar ke kinare ret ki diwar hun

kaun sa hai marhala jo mujh se tai pata nahin

main khud apne raste ki manzil-e-dushwar hun

jis ko parhna hai mujhe wo pahli fursat mein parhe

subh ke hathon mein pichhli rat ka akhbar hun

khwab hai mere liye mauj hawa ki tazgi

main shajar par zard patte ki tarah bedar hun

meri gardan par saba hai apni shohrat ka lahu

main amal ki raushni mein jurm ka iqrar hun