بے معنی لا حاصل ردی شعروں کا ہے جال ادھر

بے معنی لا حاصل ردی شعروں کا ہے جال ادھر

جو چیزیں بیکار ہیں پیارے ان چیزوں کو ڈال ادھر

کچھ تجویزیں پاس کرے گا وقت کے ہاتھوں یہ اجلاس

مجبور و نادار ادھر ہیں آسودہ خوش حال ادھر

بیچ میں حائل کر دے کوئی کاش تکلف کی دیوار

ادھر ہے ریلا گل چینوں کا اور گلوں میں کال ادھر

خون تمنا کی سرخی سے دل کی حکایت ہے رنگیں

دامن کی تقدیر ادھر ہے گلشن کا اقبال ادھر

ان کی بزم سے آنے والے تھام کے دل فرماتے ہیں

جانے والو ادھر نہ جاؤ جرم ہے عرض حال ادھر

جلسۂ غم کی تیاری میں ادھر ہیں جیتے جی مصروف

پیدائش کا جشن منایا یاروں نے ہر سال ادھر

اک مدت سے دیکھ رہا ہوں ہوتا ہے ہر بار یہی

ادھر صباؔ نے خواب سجایا وقت نے بدلی چال ادھر

be maani la hasil ridi sheron ka hai jal idhar

jo chizen bekar hain pyare in chizon ko dal idhar

kuchh tajwizen pas karega waqt ke hathon ye ijlas

majbur-o-nadar idhar hain asuda khush hal idhar

bich mein hail kar de koi kash takalluf ki diwar

idhar hai rela gul chainon ka aur gulon mein kal idhar

khun-e-tamanna ki surkhi se dil ki hikayat hai rangin

daman ki taqdir idhar hai gulshan ka iqbal idhar

un ki bazm se ane wale tham ke dil farmate hain

jane walo idhar na jao jurm hai arz-e-hal idhar

jalsa-e-gham ki tayyari mein idhar hain jite ji masruf

paidaish ka jashn manaya yaron ne har sal idhar

ik muddat se dekh raha hun hota hai har bar yahi

idhar saba ne khwab sajaya waqt ne badli chal idhar