نیا شگوفہ اشارۂ یار پر کھلا ہے

نیا شگوفہ اشارۂ یار پر کھلا ہے

گلاب اب کے چمن کی دیوار پر کھلا ہے

یہ کیسی انگڑائی لی ہے احساس زندگی نے

مسیح کا رنگ روئے بیمار پر کھلا ہے

نفی کا جادو جگا رہی ہیں طلسمی آنکھیں

وہ حرف مطلب فصیل اظہار پر کھلا ہے

کتاب رخ ہے حجاب تقدیس حسن جاناں

یہ راز کیسا مذاق دیدار پر کھلا ہے

بہار آگیں حیات افروز پھول بن کر

لہو کا چھینٹا قبائے ایثار پر کھلا ہے

مجھے بنایا گیا تھا خاموشیوں کا پیکر

یہ غنچۂ لب کسی کے اصرار پر کھلا ہے

صباؔ کا ذوق سخن نگار غزل کے حق میں

وہ کالا تل ہے جو گورے رخسار پر کھلا ہے

naya shagufa ishara-e-yar par khula hai

gulab ab ke chaman ki diwar par khula hai

ye kaisi angrai li hai ehsas-e-zindagi ne

masih ka rang-e-ru-e-bimar par khula hai

nafi ka jadu jaga rahi hain tilismi ankhen

wo harf-e-matlab fasil-e-izhar par khula hai

kitab-e-rukh hai hijab taqdis-e-husn janan

ye raz kaisa mazaq-e-didar par khula hai

bahar agin hayat afroz phul ban kar

lahu ka chhinta qaba-e-isar par khula hai

mujhe banaya gaya tha khamoshiyon ka paikar

ye ghuncha-e-lab kisi ke israr par khula hai

saba ka zauq-e-sukhan nigar-e-ghazal ke haq mein

wo kala til hai jo gore rukhsar par khula hai