میکدے کی شرط دور بادہ و ساغر کی قید

میکدے کی شرط دور بادہ و ساغر کی قید

ایک میری تشنگی اور اس پہ دنیا بھر کی قید

عشق میں صحرا نوردی کا بہانہ چاہئے

وحشت دل کے لئے اچھی نہیں ہے گھر کی قید

ماورا عرش ہے میرے تخیل کی اڑان

حرف بے معنی سمجھتا ہوں میں بال و پر کی قید

داعی سوز جگر ہو کیوں نہ پروانے کی خاک

شمع محفل کے لئے ہے موم کے پیکر کی قید

زندگی کا ماحصل ہے اضطراب زندگی

جادۂ الفت میں لازم ہے دل مضطر کی قید

آدمی کی خواب گاہیں ہیں صلیب و تیغ بھی

نیند سے بے تاب آنکھوں کو نہیں بستر کی قید

کیا جہان رنگ و نکہت کی قسم کافی نہ تھی

کیوں پئے سوگند رکھی تم نے اپنے سر کی قید

وقت کے سیل رواں کے سامنے کچھ بھی نہیں

بادبان عزم کی بندش ہو یا لنگر کی قید

سر بہ سجدہ جب کبھی ذوق جبیں سائی ہوا

جذب الفت نے لگا دی اس کے سنگ در کی قید

کیا کسی دریا کی لہریں گن نہیں سکتا تھا میں

خواب میں رکھی گئی کیوں ریت کے منظر کی قید

میری نظروں میں محبت وہ عبادت ہے صباؔ

جس عبادت میں نہیں ہے پھول اور پتھر کی قید

maikade ki shart daur-e-bada-o-saghar ki qaid

ek meri tishnagi aur us pe duniya bhar ki qaid

ishq mein sahra nawardi ka bahana chahiye

wahshat-e-dil ke liye achchhi nahin hai ghar ki qaid

mawara-e-arsh hai mere takhayyul ki uran

harf-e-be maani samajhta hun main bal-o-par ki qaid

dai-e-soz-e-jigar ho kyun na parwane ki khak

sham-e-mahfil ke liye hai mom ke paikar ki qaid

zindagi ka mahasal hai iztirab-e-zindagi

jada-e-ulfat mein lazim hai dil-e-muztar ki qaid

admi ki khwab gahen hain salib-o-tegh bhi

nind se be tab ankhon ko nahin bistar ki qaid

kya jahan-e-rang-o-nikhat ki qasam kafi na thi

kyun piye saugand rakhi tum ne apne sar ki qaid

waqt ke sail-e-rawan ke samne kuchh bhi nahin

badban-e-azm ki bandish ho ya langar ki qaid

sar ba sajda jab kabhi zauq-e-jabin sai hua

jazb-e-ulfat ne laga di us ke sang dar ki qaid

kya kisi dariya ki lahren gin nahin sakta tha main

khwab mein rakhi gai kyun ret ke manzar ki qaid

meri nazron mein mohabbat wo ibadat hai saba

jis ibadat mein nahin hai phul aur patthar ki qaid