کسی نے حال جو پوچھا کبھی محبت سے

کسی نے حال جو پوچھا کبھی محبت سے

لپٹ کے رویا بہت دیر اس سے شدت سے

ہمارا ساتھ جو چھوٹا تو اس میں حیرت کیا

ہمارے ہاتھ تو چھوٹے ہوئے تھے مدت سے

یہ اور بات کہ بینائی جا چکی میری

تمہارے خواب رکھے ہیں مگر حفاظت سے

جب اس نے بھیڑ میں مجھ کو گلے لگایا تھا

ہر ایک آنکھ مجھے تک رہی تھی حیرت سے

یہ کاروبار سیاست بہت ہی اچھا ہے

بس آپ جھوٹ کو بیچو بڑی صداقت سے

kisi ne hal jo puchha kabhi mohabbat se

lipat ke roya bahut der us se shiddat se

hamara sath jo chhota to is mein hairat kya

hamare hath to chhote hue the muddat se

ye aur bat ke binai ja chuki meri

tumhare khwab rakhe hain magar hifazat se

jab us ne bhir mein mujh ko gale lagaya tha

har ek ankh mujhe tak rahi thi hairat se

ye karobar-e-siyasat bahut hi achchha hai

bas ap jhut ko becho bari sadaqat se