حسن کے پیار کے سکھ دکھ کے ترانے گم ہیں

حسن کے پیار کے سکھ دکھ کے ترانے گم ہیں

وقت کی گود میں کیا کیا نہ خزانے گم ہیں

دور تک غم کا دھواں ایک بھیانک سا سماں

اب رکیں بھی تو کہاں سارے ٹھکانے گم ہیں

کس کو معلوم ہے تاریخ کے تہہ خانوں میں

کتنے خوابوں کے جہاں کتنے زمانے گم ہیں

کوئی مے خانہ رہا نہ کوئی ویرانہ رہا

دو ہی بس اپنے ٹھکانے تھے ٹھکانے گم ہیں

ساز بھی روٹھ گئے تار بھی سب ٹوٹ گئے

بحر خاموش میں مدہوشؔ ترانے گم ہیں

husn ke pyar ke sukh dukh ke tarane gum hain

waqt ki god mein kya kya na khazane gum hain

dur tak gham ka dhuan ek bhayanak sa saman

ab ruken bhi to kahan sare thikane gum hain

kis ko maalum hai tarikh ke tah khanon mein

kitne khwabon ke jahan kitne zamane gum hain

koi mai khana raha na koi wirana raha

do hi bas apne thikane the thikane gum hain

saz bhi ruth gae tar bhi sab tut gae

bahr-e-khamosh mein madhosh tarane gum hain