بستر کرب پہ جب نیند جلائی میں نے

بستر کرب پہ جب نیند جلائی میں نے

تب کسی خواب کی بنیاد اٹھائی میں نے

زخم ایسے تھے کہ ہر شخص کے آگے رکھے

بات ایسی تھی کہ خود سے بھی چھپائی میں نے

حرمت غم کے لئے خود کو اذیت بخشی

پھر اسی درد سے تسکین بھی پائی میں نے

میں نے زخموں کو کریدا انہیں تازہ رکھا

تب کہیں دشت میں کی نغمہ سرائی میں نے

اپنی کھڑکی سے یوں ہی خود کو پکارا کل شب

اور پھر خود کو وہ آواز سنائی میں نے

جانے والے سے رگ جاں کا بھی رشتہ تھا سمیرؔ

یہ سمجھنے میں بہت دیر لگائی میں نے

bistar-e-karb pe jab nind jalai main ne

tab kisi khwab ki buniyad uthai main ne

zakhm aise the ke har shakhs ke age rakhe

bat aisi thi ke khud se bhi chhupai main ne

hurmat-e-gham ke liye khud ko aziyyat bakhshi

phir isi dard se taskin bhi pai main ne

main ne zakhmon ko kureda unhen taza rakha

tab kahin dasht mein ki naghma sarai main ne

apni khirki se yun hi khud ko pukara kal shab

aur phir khud ko wo awaz sunai main ne

jane wale se rag-e-jan ka bhi rishta tha samer

ye samajhne mein bahut der lagai main ne