بہت شاداب ہو لیکن بیابانی نہیں جاتی

بہت شاداب ہو لیکن بیابانی نہیں جاتی

کہ بام اوج چھونے سے بھی ارزانی نہیں جاتی

کئی چہروں نے آوازوں نے دل آباد رکھا ہے

مگر آنکھوں میں رقصاں ہے جو ویرانی نہیں جاتی

مجھے اپنی نمو کے واسطے تم سے بچھڑنا ہے

تمہارے ساتھ رہنے سے تن آسانی نہیں جاتی

میں اس دل کی سبھی سچائیاں تسلیم کرتا ہوں

مگر اک بات ایسی بھی ہے جو مانی نہیں جاتی

ہجوم شور و غل میں کون تھا کس نے پکارا تھا

یہاں تو اپنی بھی آواز پہچانی نہیں جاتی

سمیرؔ اس عشق میں انسان کیا اتنا بدلتا ہے

میں خود پر غور کرتا ہوں تو حیرانی نہیں جاتی

bahut shadab ho lekin bayabani nahin jati

ke bam-e-auj chhune se bhi arzani nahin jati

kai chehron ne awazon ne dil abad rakha hai

magar ankhon mein raqsan hai jo wirani nahin jati

mujhe apni numu ke waste tum se bichharna hai

tumhare sath rahne se tan asani nahin jati

main is dil ki sabhi sachchaiyan taslim karta hun

magar ik bat aisi bhi hai jo mani nahin jati

hujum-e-shor-o-ghul mein kaun tha kis ne pukara tha

yahan to apni bhi awaz pahchani nahin jati

samer is ishq mein insan kya itna badalta hai

main khud par ghaur karta hun to hairani nahin jati