ذات میں موجود موجوں کی روانی سے اٹھا

ذات میں موجود موجوں کی روانی سے اٹھا

زندگی کا لطف طرز زندگانی سے اٹھا

یا مرے لوگوں کو دے یا رب سماعت کا شعور

یا مری آواز گوش لا معانی سے اٹھا

آئینے کو عکس کی زنجیر سے آزاد کر

چہرگی کو خال و خد کی ترجمانی سے اٹھا

اک نئی ہی شکل پیدا کر شکست و ریخت سے

اک نیا مفہوم اپنی رائگانی سے اٹھا

ایک بازو سے اٹھا تو مشعل منزل سمیرؔ

اور سفر کا بوجھ اپنے دست ثانی سے اٹھا

zat mein maujud maujon ki rawani se utha

zindagi ka lutf tarz-e-zindagani se utha

ya mire logon ko de ya rab samaat ka shuur

ya miri awaz gosh-e-la maani se utha

aine ko aks ki zanjir se azad kar

chehragi ko khal-o-khad ki tarjumani se utha

ik nai hi shakl paida kar shikast-o-rekht se

ik naya mafhum apni raigani se utha

ek bazu se utha to mashal-e-manzil samer

aur safar ka bojh apne dast-e-sani se utha