جو کچھ دیکھا اور سمجھا ہے نذر لوح و قلم کرتا ہوں

جو کچھ دیکھا اور سمجھا ہے نذر لوح و قلم کرتا ہوں

یعنی چشم حیرت پر میں سچے خواب رقم کرتا ہوں

پہلے میری دانائی پر کوئی وحشت چھا جاتی ہے

اور پھر پوری قوت سے میں اس کی شدت کم کرتا ہوں

زخم ملامت نوچتے رہنا ویسے بھی تو بے مصرف ہے

جتنا ہو سکتا ہے مجھ سے بس اتنا ہی غم کرتا ہوں

یوں تو سارے جگ سے لڑ کر میں نے خود کو منوایا ہے

لیکن اک گوشے میں اپنے ہونے کا ماتم کرتا ہوں

دل اور دنیا ایک جگہ پر یکساں روشن کب ہوتے ہیں

ایک چراغ کی لو بھڑکا کر ایک دیا مدھم کرتا ہوں

ورنہ سمیرؔ اس سناٹے میں کوئی کیسے رہ سکتا ہے

جس حد تک ممکن ہو مجھ سے آوازیں پیہم کرتا ہوں

jo kuchh dekha aur samjha hai nazr-e-lauh-o-qalam karta hun

yaani chashm-e-hairat par main sachche khwab raqam karta hun

pahle meri danai par koi wahshat chha jati hai

aur phir puri quwwat se main us ki shiddat kam karta hun

zakhm malamat nochte rahna waise bhi to be masraf hai

jitna ho sakta hai mujh se bas itna hi gham karta hun

yun to sare jag se lar kar main ne khud ko manwaya hai

lekin ik goshe main apne hone ka matam karta hun

dil aur duniya ek jagah par yaksan raushan kab hote hain

ek charagh ki lau bharka kar ek diya maddham karta hun

warna samer is sannate mein koi kaise rah sakta hai

jis had tak mumkin ho mujh se awazen paiham karta hun