خامشی کے بطن سے یہ گفتنی پیدا ہوئی

خامشی کے بطن سے یہ گفتنی پیدا ہوئی

میں بظاہر چپ ہوا اور شاعری پیدا ہوئی

اس طرح ثابت ہوا غم اور خوشی کا امتزاج

ہنستے ہنستے اس کی آنکھوں میں نمی پیدا ہوئی

جرم کی پاداش میں ہم خاک پر پھینکے گئے

سو یہاں پر انتقاماً زندگی پیدا ہوئی

خوف نے ہی مصلحت کی راہ بھی ایجاد کی

میں اندھیروں سے ڈرا اور روشنی پیدا ہوئی

دل میں کب اتری کسی کے بے معانی گفتگو

بات کرنے سے تو بس آواز ہی پیدا ہوئی

khamushi ke batn se ye guftni paida hui

main bazahir chup hua aur shayari paida hui

is tarah sabit hua gham aur khushi ka imtizaj

hanste hanste us ki ankhon mein nami paida hui

jurm ki padash mein ham khak par phenke gae

so yahan par intiqaman zindagi paida hui

khauf ne hi maslahat ki rah bhi ijad ki

main andheron se dara aur raushni paida hui

dil mein kab utri kisi ke be maani guftugu

bat karne se to bas awaz hi paida hui