تیرے غم کے شکار ہیں ہم لوگ

تیرے غم کے شکار ہیں ہم لوگ

پھر بھی تجھ پر نثار ہیں ہم لوگ

ہم سے پوچھو مآل لالہ و گل

کشتگان بہار ہیں ہم لوگ

جس کو سن کر فلک لرز اٹھے

وہ فغاں وہ پکار ہیں ہم لوگ

کل نسیم سحر کا جھونکا تھے

آج گرد و غبار ہیں ہم لوگ

زندگی کو خبر نہیں لیکن

زندگی کا وقار ہیں ہم لوگ

ہم سے بھی بے رخی ارے توبہ

آپ کے رازدار ہیں ہم لوگ

جانے کیا راز ہے یہ اے غمگینؔ

جانے کیوں بے قرار ہیں ہم لوگ

tere gham ke shikar hain ham log

phir bhi tujh par nisar hain ham log

ham se puchho maal-e-lala-o-gul

kishtgan-e-bahar hain ham log

jis ko sun kar falak laraz uthe

wo fughan wo pukar hain ham log

kal nasim-e-sahar ka jhonka the

aj gard-o-ghubar hain ham log

zindagi ko khabar nahin lekin

zindagi ka waqar hain ham log

ham se bhi be rukhi are tauba

ap ke razdar hain ham log

jane kya raz hai ye ai ghamgin

jane kyun be qarar hain ham log