اس ٹوٹے ہوئے دل کا سہارا ہے ترا غم

اس ٹوٹے ہوئے دل کا سہارا ہے ترا غم

ہمدرد حقیقت میں ہمارا ہے ترا غم

توفیق عطا کرتا ہے رونے کی ہر اک پل

کیا میری طرح درد کا مارا ہے ترا غم

رخ موڑ دیا کرتے ہیں طوفانوں کا وہ لوگ

جن لوگوں کی نظروں میں کنارا ہے ترا غم

برباد کیا گلشن ہستی ترے غم نے

اے دوست مجھے پھر بھی گوارا ہے ترا غم

جس پھول کی خوشبو سے مہک جائے گلستاں

غمگینؔ کو اس پھول سے پیارا ہے ترا غم

is tute hue dil ka sahara hai tira gham

hamdard haqiqat mein hamara hai tira gham

taufiq ata karta hai rone ki har ik pal

kya meri tarah dard ka mara hai tira gham

rukh mor diya karte hain tufanon ka wo log

jin logon ki nazron mein kinara hai tira gham

barbad kiya gulshan-e-hasti tire gham ne

ai dost mujhe phir bhi gawara hai tira gham

jis phul ki khushbu se mahak jae gulistan

ghamgin ko us phul se pyara hai tira gham