دریا میں ہے سراب عجب ابتلا میں ہوں

دریا میں ہے سراب عجب ابتلا میں ہوں

میں بھی حسین ہی کی طرح کربلا میں ہوں

ٹکتے نہیں کہیں بھی قدم آرزوؤں کے

پھینکا ہے جب سے تیری زمیں نے خلا میں ہوں

آواز کب سے دیتا تھا حرماں نصیب دل

اب آئی ہے تو غرق نشاط بلا میں ہوں

کیا فرض ہے کہ عیسیٰ و مریم دکھائی دے

مصلوب درد چیخے کہ میں ابتلا میں ہوں

ہر لحظہ انہدام کا ہے خوف مجھ کو ہوشؔ

میں اس دیار شور و شر زلزلہ میں ہوں

dariya mein hai sarab ajab ibtila mein hun

main bhi hasin hi ki tarah karbala mein hun

tikte nahin kahin bhi qadam arzuon ke

phenka hai jab se teri zamin ne khala mein hun

awaz kab se deta tha hirman nasib-e-dil

ab ai hai to gharq-e-nishat-e-bala mein hun

kya farz hai ke isa-o-maryam dikhai de

maslub dard chikhe ke main ibtila mein hun

har lahza inhidam ka hai khauf mujh ko hosh

main is dayar-e-shor-o-shar-e-zalzala mein hun