Arooz is now on the App Store, for iPhone and iPad. Download →

All poetry

اے حسن خوش صفات مرے ساتھ ساتھ چل

Lucky farooqi Hasrat (b. 1990)

اے حسن خوش صفات مرے ساتھ ساتھ چل

کرنی ہے تجھ سے بات مرے ساتھ ساتھ چل

ساحل کی بھیگی ریت پہ کچھ دور ننگے پاؤں

ہاتھوں میں ڈالے ہاتھ مرے ساتھ ساتھ چل

اک شب گزارنی ہے غزل کے دیار میں

شمع تصورات مرے ساتھ ساتھ چل

سورج تو اعتبار کے قابل نہیں رہا

اے پورنما کی رات مرے ساتھ ساتھ چل

ہر شخص واسنا کا پجاری ہے شہر میں

کمسن ہے تیری ذات مرے ساتھ ساتھ چل

کب سے میں کر رہا ہوں ترے در پہ التجا

اب مان بھی جا بات مرے ساتھ ساتھ چل

لے جا رہے ہیں لوگ مجھے قبر گاہ میں

آ واجب الزکوۃ مرے ساتھ ساتھ چل

حسرتؔ عبادتوں کے تصوف میں ہو کے گم

کعبہ سے سومنات میرے ساتھ ساتھ چل