عشق تاروں سے نہ مہتاب سے دل داری کی

عشق تاروں سے نہ مہتاب سے دل داری کی

رات نے دھوپ کے بستر پہ سیہ کاری کی

میں وہ دہقان جنوں خیز ہوں جس نے اپنے

جسم کے کھیت میں زخموں کی شجرکاری کی

مدتوں لٹکی رہی موم کی زنجیر سے لاش

برف کے سوکھے ہوئے پیڑ پہ چنگاری کی

چند سانسوں کے لئے اپنا مداوا کر کے

تو نے امراض خداداد سے غداری کی

کچھ تغیر کی یہ راتیں بھی بہت لمبی ہیں

کچھ مری قوم کو عادت نہیں بیداری کی

سوئی کے چھید سے ہاتھی کا گزر ممکن ہے

اسے کہتے ہیں تخیل کی بہت باریکی

تم نے لفظوں کی نمائش پہ فقط دھیان دیا

میں نے کاغذ کے حسیں جسم پہ گل کاری کی

روح پر عطر لگا کے مرے پاس آیا کر

تیرے کردار سے بو آتی ہے مکاری کی

بزم دانش میں نہ منہ کھولنا اپنا حسرتؔ

تجھ سے امید نہیں مجھ کو سمجھ داری کی

ishq taron se na mahtab se dil dari ki

rat ne dhup ke bistar pe siyah kari ki

main wo dehqan-e-junun khez hun jis ne apne

jism ke khet mein zakhmon ki shajarkari ki

muddaton latki rahi mom ki zanjir se lash

barf ke sukhe hue per pe chingari ki

chand sanson ke liye apna mudawa kar ke

tu ne amraz khudadad se ghaddari ki

kuchh taghayyur ki ye raten bhi bahut lambi hain

kuchh miri qaum ko adat nahin bedari ki

soi ke chhed se hathi ka guzar mumkin hai

use kahte hain takhayyul ki bahut bariki

tum ne lafzon ki numaish pe faqat dhyan diya

main ne kaghaz ke hasin jism pe gul kari ki

ruh par itr laga ke mire pas aya kar

tere kirdar se bu ati hai makkari ki

bazm-e-danish mein na munh kholna apna hasrat

tujh se ummid nahin mujh ko samajh dari ki