ہم سے یہ قتل کے منظر نہیں دیکھے جاتے

ہم سے یہ قتل کے منظر نہیں دیکھے جاتے

شاہراہوں پہ کٹے سر نہیں دیکھے جاتے

جب کفن باندھ کے نکلے ہو شہادت کے لئے

پھر پلٹ کر تو کبھی گھر نہیں دیکھے جاتے

فکر کا کاش دریچہ ہی کوئی کھل جائے

ذہن انسانوں کے بنجر نہیں دیکھے جاتے

ہم نے ہنستے ہوئے پھولوں میں گزاری ہے حیات

ہم سے بربادی کے منظر نہیں دیکھے جاتے

دیکھ لینے سے بھی ہوتی ہے تسلی دل کو

آئنے ہاتھ سے چھو کر نہیں دیکھے جاتے

غم کی راہوں سے بھی ہنستے ہوئے گزرو واقفؔ

راہ میں خار یا پتھر نہیں دیکھے جاتے

ham se ye qatl ke manzar nahin dekhe jate

shahrahon pe kate sar nahin dekhe jate

jab kafan bandh ke nikle ho shahadat ke liye

phir palat kar to kabhi ghar nahin dekhe jate

fikr ka kash daricha hi koi khul jae

zehn-e-insanon ke banjar nahin dekhe jate

ham ne hanste hue phulon mein guzari hai hayat

ham se barbadi ke manzar nahin dekhe jate

dekh lene se bhi hoti hai tasalli dil ko

aine hath se chhu kar nahin dekhe jate

gham ki rahon se bhi hanste hue guzro waqif

rah mein khar ya patthar nahin dekhe jate