اب تو ہو کسی رنگ میں ظاہر تو مجھے کیا

اب تو ہو کسی رنگ میں ظاہر تو مجھے کیا

ٹھہرے ترے گھر کوئی مسافر تو مجھے کیا

ویرانۂ جاں کی جو فضا تھی سو رہے گی

چہکے کسی گلشن میں وہ طائر تو مجھے کیا

وہ شمع مرے گھر میں تو بے نور ہی ٹھہری

بازار میں وہ جنس ہو نادر تو مجھے کیا

وہ رنگ فشاں آنکھ وہ تصویر نما ہاتھ

دکھلائیں نئے روز مناظر تو مجھے کیا

میں نے اسے چاہا تھا تو چاہا نہ گیا میں

چاہے مجھے اب وہ مری خاطر تو مجھے کیا

دنیا نے تو جانا کہ نمو اس میں ہے میری

اب ہو وہ مری ذات کا منکر تو مجھے کیا

اک خواب تھا اور بجھ گیا آنکھوں ہی میں اپنی

اب کوئی پکارے مرے شاعر تو مجھے کیا

ab to ho kisi rang mein zahir to mujhe kya

thahre tire ghar koi musafir to mujhe kya

wirana-e-jan ki jo faza thi so rahegi

chahke kisi gulshan mein wo tair to mujhe kya

wo shama mire ghar mein to be nur hi thahri

bazar mein wo jins ho nadir to mujhe kya

wo rang fishan ankh wo taswir numa hath

dikhlaen nae roz manazir to mujhe kya

main ne use chaha tha to chaha na gaya main

chahe mujhe ab wo miri khatir to mujhe kya

duniya ne to jana ke numu is mein hai meri

ab ho wo miri zat ka munkir to mujhe kya

ik khwab tha aur bujh gaya ankhon hi main apni

ab koi pukare mire shayar to mujhe kya