کچھ عشق تھا کچھ مجبوری تھی سو میں نے جیون وار دیا

کچھ عشق تھا کچھ مجبوری تھی سو میں نے جیون وار دیا

میں کیسا زندہ آدمی تھا اک شخص نے مجھ کو مار دیا

اک سبز شاخ گلاب کی تھا اک دنیا اپنے خواب کی تھا

وہ ایک بہار جو آئی نہیں اس کے لیے سب کچھ ہار دیا

یہ سجا سجایا گھر ساتھی مری ذات نہیں مرا حال نہیں

اے کاش کبھی تم جان سکو جو اس سکھ نے آزار دیا

میں کھلی ہوئی اک سچائی مجھے جاننے والے جانتے ہیں

میں نے کن لوگوں سے نفرت کی اور کن لوگوں کو پیار دیا

وہ عشق بہت مشکل تھا مگر آسان نہ تھا یوں جینا بھی

اس عشق نے زندہ رہنے کا مجھے ظرف دیا پندار دیا

میں روتا ہوں اور آسمان سے تارے ٹوٹتے دیکھتا ہوں

ان لوگوں پر جن لوگوں نے مرے لوگوں کو آزار دیا

وہ یار ہوں یا محبوب مرے یا کبھی کبھی ملنے والے

اک لذت سب کے ملنے میں وہ زخم دیا یا پیار دیا

مرے بچوں کو اللہ رکھے ان تازہ ہوا کے جھونکوں نے

میں خشک پیڑ خزاں کا تھا مجھے کیسا برگ و بار دیا

kuchh ishq tha kuchh majburi thi so main ne jiwan war diya

main kaisa zinda admi tha ik shakhs ne mujh ko mar diya

ik sabz shakh-e-gulab ki tha ik duniya apne khwab ki tha

wo ek bahar jo ai nahin us ke liye sab kuchh har diya

ye saja sajaya ghar sathi miri zat nahin mira hal nahin

ai kash kabhi tum jan sako jo is sukh ne azar diya

main khuli hui ik sachchai mujhe janne wale jante hain

main ne kin logon se nafrat ki aur kin logon ko pyar diya

wo ishq bahut mushkil tha magar asan na tha yun jina bhi

is ishq ne zinda rahne ka mujhe zarf diya pindar diya

main rota hun aur asman se tare tutte dekhta hun

un logon par jin logon ne mire logon ko azar diya

wo yar hun ya mahbub mire ya kabhi kabhi milne wale

ik lazzat sab ke milne mein wo zakhm diya ya pyar diya

mire bachchon ko allah rakhe un taza hawa ke jhonkon ne

main khushk per khizan ka tha mujhe kaisa barg-o-bar diya