چہرہ ہوا میں اور مری تصویر ہوئے سب

چہرہ ہوا میں اور مری تصویر ہوئے سب

میں لفظ ہوا مجھ میں ہی زنجیر ہوئے سب

بنیاد بھی میری در و دیوار بھی میرے

تعمیر ہوا میں کہ یہ تعمیر ہوئے سب

ویسے ہی لکھو گے تو مرا نام بھی ہوگا

جو لفظ لکھے وہ مری جاگیر ہوئے سب

مرتے ہیں مگر موت سے پہلے نہیں مرتے

یہ واقعہ ایسا ہے کہ دلگیر ہوئے سب

وہ اہل قلم سایۂ رحمت کی طرح تھے

ہم اتنے گھٹے اپنی ہی تعزیر ہوئے سب

اس لفظ کی مانند جو کھلتا ہی چلا جائے

یہ ذات و زماں مجھ سے ہی تحریر ہوئے سب

اتنا سخن میرؔ نہیں سہل خدا خیر

نقاد بھی اب معتقد میرؔ ہوئے سب

chehra hawa mein aur miri taswir hue sab

main lafz hua mujh mein hi zanjir hue sab

buniyad bhi meri dar-o-diwar bhi mere

taamir hawa mein ke ye taamir hue sab

waise hi likhoge to mira nam bhi hoga

jo lafz likhe wo miri jagir hue sab

marte hain magar maut se pahle nahin marte

ye waqia aisa hai ke dilgir hue sab

wo ahl-e-qalam saya-e-rahmat ki tarah the

ham itne ghate apni hi taazir hue sab

is lafz ki manind jo khulta hi chala jae

ye zat-o-zaman mujh se hi tahrir hue sab

itna sukhan-e-mir nahin sahl khuda khair

naqqad bhi ab motaqid-e-mir hue sab