پا بہ زنجیر سہی زمزمہ خواں ہیں ہم لوگ

پا بہ زنجیر سہی زمزمہ خواں ہیں ہم لوگ

محفل وقت تری روح رواں ہیں ہم لوگ

دوش پر بار‌‌ شب‌ غم لئے گل کی مانند

کون سمجھے کہ محبت کی زباں ہیں ہم لوگ

خوب پایا ہے صلہ تیری پرستاری کا

دیکھ اے صبح طرب آج کہاں ہیں ہم لوگ

اک متاع دل و جاں پاس تھی سو ہار چکے

ہائے یہ وقت کہ اب خود پہ گراں ہیں ہم لوگ

نکہت گل کی طرح ناز سے چلنے والو

ہم بھی کہتے تھے کہ آسودۂ جاں ہیں ہم لوگ

کوئی بتلائے کہ کیسے یہ خبر عام کریں

ڈھونڈتی ہے جسے دنیا وہ نشاں ہیں ہم لوگ

قسمت‌ شب زدگاں جاگ ہی جائے گی علیمؔ

جرس قافلۂ خوش خبراں ہیں ہم لوگ

pa ba zanjir sahi zamzama khwan hain ham log

mahfil-e-waqt tiri ruh-e-rawan hain ham log

dosh par bar shab-e-gham liye gul ki manind

kaun samjhe ke mohabbat ki zaban hain ham log

khub paya hai sila teri parastari ka

dekh ai subh-e-tarab aj kahan hain ham log

ik mata-e-dil-o-jan pas thi so har chuke

hae ye waqt ke ab khud pe giran hain ham log

nikhat-e-gul ki tarah naz se chalne walo

ham bhi kahte the ke asuda-e-jan hain ham log

koi batlae ke kaise ye khabar am karen

dhundti hai jise duniya wo nishan hain ham log

qismat shab zadagan jag hi jaegi alim

jaras-e-qafila-e-khush khabaran hain ham log