مرے خدا مجھے وہ تاب نے نوائی دے

مرے خدا مجھے وہ تاب نے نوائی دے

میں چپ رہوں بھی تو نغمہ مرا سنائی دے

گدائے کوئے سخن اور تجھ سے کیا مانگے

یہی کہ مملکت شعر کی خدائی دے

نگاہ دہر میں اہل کمال ہم بھی ہوں

جو لکھ رہے ہیں وہ دنیا اگر دکھائی دے

چھلک نہ جاؤں کہیں میں وجود سے اپنے

ہنر دیا ہے تو پھر ظرف کبریائی دے

مجھے کمال سخن سے نوازنے والے

سماعتوں کو بھی اب ذوق آشنائی دے

نمو پزیر ہے یہ شعلۂ نوا تو اسے

ہر آنے والے زمانے کی پیشوائی دے

کوئی کرے تو کہاں تک کرے مسیحائی

کہ ایک زخم بھرے دوسرا دہائی دے

میں ایک سے کسی موسم میں رہ نہیں سکتا

کبھی وصال کبھی ہجر سے رہائی دے

جو ایک خواب کا نشہ ہو کم تو آنکھوں کو

ہزار خواب دے اور جرأت رسائی دے

mire khuda mujhe wo tab ne nawai de

main chup rahun bhi to naghma mira sunai de

gadae ku-e-sukhan aur tujh se kya mange

yahi ke mamlukat-e-sher ki khudai de

nigah-e-dahr mein ahl-e-kamal ham bhi hun

jo likh rahe hain wo duniya agar dikhai de

chhalak na jaun kahin main wajud se apne

hunar diya hai to phir zarf kibriyai de

mujhe kamal-e-sukhan se nawazne wale

samaaton ko bhi ab zauq-e-ashnai de

numu pazer hai ye shola-e-nawa to use

har ane wale zamane ki peshwai de

koi kare to kahan tak kare masihai

ke ek zakhm bhare dusra duhai de

main ek se kisi mausam mein rah nahin sakta

kabhi wisal kabhi hijr se rihai de

jo ek khwab ka nasha ho kam to ankhon ko

hazar khwab de aur jurat-e-rasai de