جو اس نے کیا اسے صلہ دے
Obaidullah Aleem (1939–1998)جو اس نے کیا اسے صلہ دے
مولا مجھے صبر کی جزا دے
یا میرے دیئے کی لو بڑھا دے
یا رات کو صبح سے ملا دے
سچ ہوں تو مجھے امر بنا دے
جھوٹا ہوں تو نقش سب مٹا دے
یہ قوم عجیب ہو گئی ہے
اس قوم کو خوئے انبیا دے
اترے گا نہ کوئی آسماں سے
اک آس میں دل مگر صدا دے
بچوں کی طرح یہ لفظ میرے
معبود انہیں بولنا سکھا دے
دکھ دہر کے اپنے نام لکھوں
ہر دکھ مجھے ذات کا مزا دے
اک میرا وجود سن رہا ہے
الہام جو رات کی ہوا دے
مجھ سے مرا کوئی ملنے والا
بچھڑا تو نہیں مگر ملا دے
چہرہ مجھے اپنا دیکھنے کو
اب دست ہوس میں آئینہ دے
جس شخص نے عمر ہجر کاٹی
اس شخص کو ایک رات کیا دے
دکھتا ہے بدن کہ پھر ملے وہ
مل جائے تو روح کو دکھا دے
کیا چیز ہے خواہش بدن بھی
ہر بار نیا ہی ذائقہ دے
چھونے میں یہ ڈر کہ مر نہ جاؤں
چھو لوں تو وہ زندگی سوا دے
jo us ne kiya use sila de
maula mujhe sabr ki jaza de
ya mere diye ki lau barha de
ya rat ko subh se mila de
sach hun to mujhe amar bana de
jhuta hun to naqsh sab mita de
ye qaum ajib ho gai hai
is qaum ko khu-e-ambiya de
utrega na koi asman se
ik as mein dil magar sada de
bachchon ki tarah ye lafz mere
maabud unhen bolna sikha de
dukh dahr ke apne nam likhun
har dukh mujhe zat ka maza de
ik mera wajud sun raha hai
ilham jo rat ki hawa de
mujh se mira koi milne wala
bichhra to nahin magar mila de
chehra mujhe apna dekhne ko
ab dast-e-hawas mein aina de
jis shakhs ne umr hijr kati
us shakhs ko ek rat kya de
dikhta hai badan ke phir mile wo
mil jae to ruh ko dikha de
kya chiz hai khwahish-e-badan bhi
har bar naya hi zaiqa de
chhune mein ye dar ke mar na jaun
chhu lun to wo zindagi siwa de