عشق میں وصل کی تدبیر بتانے والا

عشق میں وصل کی تدبیر بتانے والا

کون تھا زہر کو اکسیر بتانے والا

ہوگا ناواقف آداب محبت کوئی

حلقۂ زلف کو زنجیر بتانے والا

آئنہ دیکھ کے سمجھا ہوں کہ سچ کہتا تھا

وہ مجھے آپ کی تصویر بتانے والا

مصحف رخ کی بھی تفسیر بتاتا جائے

لفظ قرآن کی تفسیر بتانے والا

میں ہی یوسف تھا زلیخا کے قفس میں کل شب

ہے کوئی خواب کی تعبیر بتانے والا

وہ جو کہتا تھا مرے ہاتھ کی ریکھا میں ہے تو

کتنا جھوٹا تھا وہ تقدیر بتانے والا

لائی ہے موت کو اب سامنے تقدیر مری

اب بتائے کوئی تدبیر بتانے والا

وہ بھی ہوگا کوئی مجروح یقیناً یارو

ابروئے ناز کو شمشیر بتانے والا

احتشامؔ اتنے بڑے شہر میں کوئی نہ ملا

اس نظر میں تری توقیر بتانے والا

ishq mein wasl ki tadbir batane wala

kaun tha zahr ko iksir batane wala

hoga nawaqif-e-adab-e-mohabbat koi

halqa-e-zulf ko zanjir batane wala

aina dekh ke samjha hun ke sach kahta tha

wo mujhe ap ki taswir batane wala

mushaf-e-rukh ki bhi tafsir batata jae

lafz quran ki tafsir batane wala

main hi yusuf tha zulekha ke qafas mein kal shab

hai koi khwab ki taabir batane wala

wo jo kahta tha mire hath ki rekha mein hai tu

kitna jhuta tha wo taqdir batane wala

lai hai maut ko ab samne taqdir miri

ab batae koi tadbir batane wala

wo bhi hoga koi majruh yaqinan yaro

abru-e-naz ko shamshir batane wala

ehtisham itne bare shahr mein koi na mila

is nazar mein tiri tauqir batane wala