یوں ترے ہجر میں آنکھوں سے ستارے ٹوٹے

یوں ترے ہجر میں آنکھوں سے ستارے ٹوٹے

جیسے سیلاب سے دریا کے کنارے ٹوٹے

شق ہوئی جیسے زمیں جیسے فلک ٹوٹ پڑا

آہ وہ وقت کہ جب ہم سے ہمارے ٹوٹے

آخرش آج ترا غم بھی ہوا دل سے جدا

رفتہ رفتہ سبھی جینے کے سہارے ٹوٹے

میری آنکھوں میں ہر اک سمت ہے لق دق صحرا

خواب بکھرے کبھی رنگین نظارے ٹوٹے

اہل دل پیار سے محروم ہوئے ہیں ایسے

جیسے مہنگائی میں افلاس کے مارے ٹوٹے

دیکھتا رہ گیا وہ کھیلنے والا بچہ

اس کے ہاتھوں میں اچانک جو غبارے ٹوٹے

احتشامؔ ایک نہ پینے کی قسم بھی دیکھیں

عہد و پیماں تو میاں آپ کے سارے ٹوٹے

yun tire hijr mein ankhon se sitare tute

jaise sailab se dariya ke kinare tute

shaqq hui jaise zamin jaise falak tut para

ah wo waqt ke jab ham se hamare tute

akhirash aj tira gham bhi hua dil se juda

rafta rafta sabhi jine ke sahare tute

meri ankhon mein har ik samt hai laq diq sahra

khwab bikhre kabhi rangin nazare tute

ahl-e-dil pyar se mahrum hue hain aise

jaise mahngai mein iflas ke mare tute

dekhta rah gaya wo khelne wala bachcha

us ke hathon mein achanak jo ghubare tute

ehtisham ek na pine ki qasam bhi dekhen

ahd-o-paiman to miyan ap ke sare tute