دکھ درد مرے پاس بھی جوہر کی طرح ہیں

دکھ درد مرے پاس بھی جوہر کی طرح ہیں

ظلمت میں وہ قندیل منور کی طرح ہیں

فٹ پاتھ پہ راتوں کو مزہ ملتا ہے گھر کا

ہم دن کے اجالے میں تو بے گھر کی طرح ہیں

ٹھہرے ہیں مگر آگے ہے چلنے کا ارادہ

ہم لوگ یہاں میل کے پتھر کی طرح ہیں

ہر موج پہ ہمت مری پتوار ہے لیکن

امید کی آنکھیں تو سمندر کی طرح ہیں

چاہیں گے تو قدموں پہ یہ دنیا بھی جھکے گی

ہم اپنے ہی ہاتھوں میں مقدر کی طرح ہیں

سڑکوں پہ نکل آئیں تو آوارہ نہ سمجھو

ہم سینۂ صحرا میں کسی گھر کی طرح ہیں

dukh dard mire pas bhi jauhar ki tarah hain

zulmat mein wo qindil munawwar ki tarah hain

fit path pe raton ko maza milta hai ghar ka

ham din ke ujale mein to be ghar ki tarah hain

thahre hain magar age hai chalne ka irada

ham log yahan mel ke patthar ki tarah hain

har mauj pe himmat miri patwar hai lekin

ummid ki ankhen to samundar ki tarah hain

chahenge to qadmon pe ye duniya bhi jhukegi

ham apne hi hathon mein muqaddar ki tarah hain

sarkon pe nikal aen to awara na samjho

ham sina-e-sahra mein kisi ghar ki tarah hain